“一個完全由資金湧入而推動既股市，係唔會令上市公司既生意大增；既然上市公司無賺多左錢，咁點樣去支撐炒高左既股價呢?”
一個健康既牛市，係因為當地政治穩定，令到經濟起飛，企業生意上升，令到市民安居樂業，對前景充滿信心，人人樂於消費，咁股市至會進入長期上升既趨勢。
反觀今次升市，受到金融海嘯衝擊，企業生意慘淡，周圍都炒緊人，令到失業率高企，人人居安思危。平心而論，點睇都唔似係牛市應該有既經濟情況。一個完全由資金湧入而推動既股市，係唔會令上市公司既生意大增；既然上市公司無賺多左錢，咁點樣去支撐炒高左既股價呢?
虛火之所以叫做虛火，係因為任你點講、點分析都唔會有實質因素去支持，而最令人覺得危險既係，虛火係唔會慢慢咁由光轉暗，而係話熄就熄，唔會有先兆。
既然成也資金，自然敗也資金，當資金一走，虛火一滅，留低既只有大量散戶接左既火棒，呢個係永恆不變既事實。
四月尾果陣，散戶仲對港股議論紛紛，有d話sell in may，有d就話一於咪理，最緊要係你不斷見低就吸。結果，幸運女神終於係五月眷顧樂觀既股民，大市不斷破關，終於升穿萬八點!
可能大家仲驚訝緊，其實與此同時，呢兩三個月既升浪，已經悄悄製造左唔少千萬富翁。
除左外資停泊左係香港，熱炒股票之外，內地d大豪客都有大手大手咁吸納港股。有移民顧問公司就話，唔少內地人為左申請黎香港定居，不惜動用650萬以上既資金，黎香港搞投資移民，除左用筆錢黎買樓之外，大部份都係炒股。有人三十幾蚊掃入匯豐，眨下眼就晉身千萬富翁既行列，實行攞到個居港權之餘，又有錢落袋，於是吸引更多大陸既大戶資金蜂擁而至。所以呢次升浪，就好似愈升愈有咁。
其實自從香港推出百分百存保政策之後，骷髏會就預計，國際資金會因為安全理由，而大舉湧入香港。存錢响美國，就算係百年老店既大型銀行，都可以一夜之間結業，反正港元同美元掛鈎，咁不如將咁大既風險轉嫁比香港政府好過啦!
而資金流入，最終點都會有部份係用黎投資，係買方力量增加既情況之下，要推高當其時低殘既港股，甚至樓市，真係可以話係不費吹灰之力。呢個舉動，又會吸引其他貪心既投資者，就好似今次d內地資金咁，幾股大勢力集結係香港，去買樓買股票，好容易形成大漲小回既格局。
而家既問題係，呢次升市，係牛市重臨，可以令大家安心炒返幾年呀? 定係熊市反彈，聽眾要步步為營至真呢?
没有评论:
发表评论